“Ti mund të ndryshosh komunitetin ku jeton...Bashkohu me rrjetin vullnetar të Bashkisë Tiranë”
Vullnetarizmi, sipas Ligjit Nr. 45/2016, është investimi me vullnet të lirë i kohës, njohurive dhe aftësive për kryerjen e aktiviteteve ose shërbimeve nga vullnetari, në dobi të ofruesit dhe/apo përfituesit të vullnetarizmit.
Vullnetarizmi lind si dëshirë spontane e të rinjve ose qytetarëve për të mbrojtur një kauzë të caktuar. Në shërbim të komunitetit vullnetari investon kohë, profesionalizëm, pasion dhe edukim. Sa më i madh të jetë numri i vullnetarëve aq më shumë solidare bëhet shoqëria jonë.
Vullnetarizëm mund të kryejë
- çdo person, vendas ose i huaj, i moshës 18-30 vjeç që gëzon zotësi të plotë për të vepruar, sipas legjislacionit në fuqi dhe me vullnet të lirë
- çdo i mitur i moshës 15 deri 18 vjeç, vetëm me pëlqimin me shkrim të prindit ose përfaqësuesit të tij ligjor
Disa arsye përse duhet të bëni vullnetarizëm
- Të bësh vullnetarizëm do të thotë të vësh në provë talentet e tua dhe të zhvillosh aftësi të reja. Nëse veprojmë të gjithë së bashku, mund të bashkojmë eksperiencat dhe të mësojmë nga ata që dinë të bëjnë gjëra të reja.
- Brezat e rinj duhet të mësojnë vlerën e dhurimit dhe t’i mund t’ua mësosh atyre këtë gjë. Ti mund të bëhesh një shembull i mirë për të gjithë të rinjtë.
- Aftësita e fituara gjatë vullnetarizmit mund t’i shfrytëzosh në jetë, gjatë studimeve dhe karrierës tënde.
- Nuk ka rrugë më të mirë se sa të gjesh shokë të rinj altruist.
- Të bësh vullnetarizëm do të thotë të marrësh pjesë në aktivitete interesante dhe vë në lëvizje ide të reja.
- Të bësh vullnetarizëm ju bën të kuptoni se sa me fat jeni në krahasim me njerëzit e tjerë. Kjo ju mëson të thoni faleminderit dhe të kuptoni se çfarë ka rëndësi vërtet në jetë.
*Për më shumë informacion kontaktoni në Email: enkelejda.hamzaj@tirana.al